Lat småflyplassane leve – vi treng dei!

Småflyplassane i Sogn og Fjordane er mykje meir enn asfalt og grasbaner – dei er livsnerven i eit fylke med store avstandar, fjell og fjordar. Når forslagsstillarane bak Civita-rapporten til Samferdsledepartementet no tek til orde for å leggja ned fleire småflyplassar, mellom anna Sandane Lufthamn og Førde Lufthamn Bringeland, må vi stoppa opp og spørja: Har dei eigentleg forstått kva desse plassane betyr for oss som bur her?

Rapporten legg opp til ei sentralisering av flyplasstrukturen i Noreg, der økonomiske vurderingar vert sette framfor beredskap, busetnad og regional utvikling. Forslagsstillarane ser ut til å tenkja at alt skal målast i kroner og kilometer – men for eit fylke utan togforbindelse, med krevjande geografi og lange avstandar, er flyplassane våre ikkje luksus, men livsnødvendige.

Sandane Lufthamn er avgjerande for Nordfjord. Ho gjev folk tilgang til rask transport til Bergen og Oslo, og held regionen knytt til resten av landet. For næringslivet i Nordfjord – frå industrien i Gloppen til reiselivet i Stryn og Stad – er Sandane eit viktig bindeledd. Flyplassen spelar òg ei sentral rolle i beredskap og helsetenester, der luftambulansen kan vera livreddande når vegane er stengde av ras eller uvêr.

Førde Lufthamn Bringeland tener eit stort omland i Sunnfjord og er like uunnverleg. Ho er viktig for pasientreiser, arbeidsreiser og for bedrifter som treng raske samband for å halda hjula i gang. Nedlegging vil ramma både næringslivet, arbeidsplassar og tilgangen til offentlege tenester.

Sogn og Fjordane har ikkje tog, og vegane er lange og vêrutsette. Flyplassane våre er difor ikkje berre transportknutepunkt – dei er ein del av grunnmuren i distrikta.

Forslagsstillarane kan tala om effektivitet frå kontora sine i Oslo, men for oss som bur her handlar dette om tryggleik, livskvalitet og framtidstru.

Sogn og Fjordane treng infrastruktur som bind oss saman – ikkje rapportar og politiske forslag som riv oss frå kvarandre. Lat oss satsa på vedlikehald, samarbeid og utvikling – ikkje nedlegging.

Småflyplassane våre er små i storleik, men store i tyding. Lat Sandane og Førde leve!

Gunn Sande, 

gruppeleiar Stad Sp, varaordførar i Stad kommune