Mange vil lage Draumeplassar
14 lokalmiljø i fylket har søkt om å bli ein av vinnarane av Draumeplassen 2018, der premien er 100 000 kr og hjelp til å skape ein naturmøteplass.
15. mai gjekk fristen ut for å søkje om bli ein av fem vinnarar av Draumeplassen. Det er 4H Sogn og Fjordane som står bak konkurransen, som er støtta av Gjensidigestiftelsen.
- Veldig gledeleg at så mange har søkt. Det å skape møteplassar i nær-naturen er noko som engasjerer positivt, smiler prosjektleiar Roger Eide i 4H Sogn og Fjordane.
Fleire ut i naturen
- Det er god geografisk spreiing mellom dei som har søkt, og det er mange ulike organisasjonar som står bak dei lokale søknadene, forklarar Eide og held fram:
- Naturmøteplassane gjer til at fleire kjem seg ut og nyttar nær-naturen. Det er mange gode plassar som er planlagt rundt omkring, både ved sjøen, i skianlegg, i skogen og langs turstiar.
Vil ha nasjonal konkurranse
Juryen som skal kåre dei fem vinnarane skal no setje seg i lag og gå gjennom alle søknadane, og så blir vinnarane utropt i juni.
- Juryen får ei interessant, utfordrande og inspirerande oppgåve med å komme fram til dei fem vinnarane, trur Roger Eide.
Najonal konkurranse
Draumeplassen-konkurransen vart lyst ut i Sogn og Fjordane for første gong i 2015, og så på ny i 2017, begge gonger med støtte frå Gjensidigestiftelsen. 4H har mål om at Draumeplassen på sikt vil bli ein nasjonal konkurranse.
- Vonleg får vi til ny konkurranse i Sogn og Fjordane i 2019, og truleg også i nye fylke. Det blir stas når vi skapar Draumeplassar over heile landet.
