– Latin-Amerika er viktig i det storpolitiske spelet

– Det skjer veldig mykje i Latin-Amerika no som er viktig i det globale politiske spelet, seier statsvitar og professor Benedicte Bull.

Ho er invitert til Sandane av «Verda og vi» 13. mars. Då skal ho snakke om «Latin-Amerika i en ny verdensorden».

– Det skjer mykje

Latin-Amerika er enkelt sagt Mexico og alt land i Sør-Amerika, og strekkjer seg såleis over to kontinent. Ein annan definisjon er alle spansk- og portugisisktalande land sør for Rio Grande.

Dette er eit område Benedicte Bull har inngåande kunnskap om. Ho har skrive fleire bøker og ei rekkje artiklar om latinamerikansk politikk og økonomi.

– Latin-Amerika er langt borte, men nett no skjer det veldig mykje i den globale storpolitikken som også er fletta inn i vår eigen kvardag på ulikt vis. Det vil eg prøve å få fram, seier ho og peikar på at det i stor grad har med naturressursar å gjere.

Latin-Amerika sit nemleg med fleire nøklar i det grøne skiftet.

Metall og mineral

I Latin-Amerika finst til dømes verdas største reserve av litium, som er viktig i framstillinga av batteri til bruk i mellom anna el-bilar. Her finn ein også verdas største koparreservar og fleire sjeldne mineral. Dessutan er Latin-Amerika rikt på energi frå både vatn og vind.

– Ikkje minst har Venezuela verdas største enkeltreservoar av olje, peikar Benedicte Bull på.

Den andre årsaka til at Latin-Amerika er sentral i det storpolitiske spelet, er den spente situasjonen mellom Kina og USA.

– Nett no er det ei rivalisering mellom USA og Kina og forholdet til Russland. Her har Latin-Amerika prøvd å tenkje nytt og vere ein aktiv og alliansefri aktør som ikkje følgjer opp verken Vestens politikk eller politikken til Kina og Russland, seier Benedicte Bull.

I realiteten er Kina blitt den viktigaste handelspartnaren til Sør-Amerika etter store kinesiske investeringar.

Politisk dreiing

Forholdet mellom USA og Kina har også endra seg.

– Ei årsak til at Latin-Amerika er blitt så viktig for Kina, er den politiske dreiinga i USA, som prøver å gjere seg mindre avhengig av Kina, og flyttar amerikanske bedrifter til Latin-Amerika, noko først og fremst Mexico tener på. USA og Kina har vore veldig knytt saman, forklarer Benedicte Bull.

Desse storpolitiske utviklingstrekka vil ho fortelje om, og i tillegg krydre framstillinga med konkrete historier frå regionen.

– Enkelte trur kanskje Latin-Amerika er for spesielt interesserte, men eg vil prøve å få fram at alt heng i hop, og at det som skjer langt vekke, er fletta inn også i vår kvardag. Kanskje kan eg til og med finne ei kopling til Sandane, seier ho.

Benedicte Bull vil også kome inn på Noreg si rolle i Latin-Amerika.

– Vi har ei høg stjerne som tilretteleggjar for dialog mellom ulike partar. Dessutan har fleire norske bedrifter etablert seg i Latin-Amerika, slik at vi også har økonomiske interesser og er med i spelet om ressursane, seier professor Benedicte Bull.

Ho har ikkje vore til Sandane før og gler seg til å kome hit.