Folkemusikarane Margit Myhr og Erlend Apneseth gir ut albumet «Slåttesong». Foto: Oddleiv Apneseth.

Apneseth og Myhr med ny plate

Folkemusikarane Margit Myhr og Erlend Apneseth gir ut albumet «Slåttesong» saman.

Med kveding og fele set folkemusikarane Margit Myhr og Erlend Apneseth fokus på norske solotradisjonar i det nye albumet «Slåttesong», skriv musikkmagasinet Ballade. Plata kjem ut 21. mai.

Medan Apneseth er kjend for å krysse grenser og sjangrar musikalsk, er Myhr skodespelar, dansar og songar, og er ein av våre fremste formidlarar av scenisk folkekunst. Sjølv om Myhr og Apneseth stadig søkjer nye uttrykk, vender dei tilbake til det tradisjonelle soloformatet med eit utval av personlege favorittar i denne utgivinga.

Det lokale repertoaret i plata er henta frå boka «Folkesong i Hallingdal», som inneheldt alt av innsamla vokalmateriale frå regionen. Hardingfelerepertoaret på plata består av slåttar frå både Hallingdal og Vestlandet, i tillegg til eigenkomponerte slåttar, skriv Ballade.

(©NPK)