Sandalar i bil kan skape farlege situasjonar

Ta deg bryet med å skifte frå sandalar og flipflops før du køyrer bil i sommar, tilrår NAF.

– Flipflops og lause sandalar kan henge fast i golvmattene og skape farlege situasjonar når du sit bak rattet, seier Ingunn Handagard, senior kommunikasjonsrådgjevar i medlemsorganisasjonen NAF.

Store konsekvensar

Riktig fottøy er viktig når du er sjåfør, uansett om du skal køyre kort eller langt. Mistar du kontakt med pedalane, kan det få store konsekvensar. Eit skobyte er fort gjort, men kan brått få mykje å seie dersom du kjem ut for noko uventa.

– Idet øyeblikket du må reagere raskt, må skoen følgje med frå gass til brems. Når du køyrer, må du ha sko som sit godt fast rundt foten og syter for at du ikke mistar kontakten med pedalane, seier Handagard.

Ikkje barbeint

I sommervarmen kan det vere smart å ha eit par gode sko liggjande bak i bilen slik at det er enkelt å skifte fottøy. Det er nemleg heller ikkje noko godt alternativ å køyre barbeint. Sjølv ein liten stein kan utløyse refleksen der du trekkjer til deg foten, i staden for å trykke den normalt ned.

– Gode køyresko er flate, har elastisk såle og sit tett og godt rundt foten, fortel Ingunn Handagard.