Framleis god plass på DNT-hytter
Kapasiteten er svært god på fjellhyttene til Den Norske Turistforening (DNT) ut sommaren, om du vil bestille på førehand eller komme umeld.
– Nesten uansett kvar i fjellet du vil reise no, kan vi garantere deg plass. Det er mogleg å bestille plass på førehand, men også å komme umeld, seier generalsekretær i DNT, Dag Terje Klarp Solvang, til Bondebladet.
Det varierande sommarvêret, passtrøbbel og flystreik kan ha ført til nøling i sommarplanlegginga i år, trur han, men lovar:
Artikkelen held fram under annonsen.
– Vi har plass til alle som vil til fjells, og mange stader er det no supre forhold. Framover no er sommarfjellet på sitt finaste.
DNT har 43 betente hytter i Sør-Noreg. Nesten alle er opne ut september. Dei tilbyr servering, gjerne trerettars med øl- og vin, og overnatting i to- til firemannsrom eller sovesal. (©NPK)