STIL hylla eldsjela Knut

50 års lokal idrettshistorie vibrerte i veggane i Sandane Idrettspark då dommarkorpset i STIL fotball denne veka hadde samling for å oppsummere sesongen 2021.

Blant klubbdommarane i STIL er Knut Stavang (85) suveren nestor, og han vart behørig hylla av dei frammøtte, med fotballeiar Gro Pleym Iversen i spissen.

– Heldig er klubben vår

Knut starta fotballkarrieren sin i 1950 i heimbyen Florø. Han debuterte for A-laget som 15-åring og vart krinslagsspelar. Han flytte til Sandane i 1970 og kom som ein vind inn i Sandane-fotballen, der han gjennom 50 år har sett djupe spor etter seg.

– Heldig er klubben vår som har hatt ei eldsjel som deg i sine rekkjer. Det du har gjort for STIL-fotballen vitnar om ei dugnadsånd langt ut over det vanlege. Du har vore ein viktig støttespelar som spelar, trenar, dommar og tilretteleggjar, med mangeårige leiarverv i fotballgruppa og hovudlaget STIL, sa Pleym Iversen i si helsing til den suverent mest garva klubbdommaren STIL nokonsinne har hatt.

Fair play

Ho hadde merka seg at Knut i dommargjerninga si framstår som ein rollemodell med tryggleik til å rettleie spelarane gjennom kampens gang.

– Fair play både på og utanfor bana er sentrale verdiar for oss i fotballen, og du bidreg på ein god måte til dette, sa ho.

– Eg har hatt glede av å vere klubbdommar, og eg gjer det utan stress. Men eg føler eg er litt gamal, eg blir 86 neste sesong, og det må vel ta slutt ein gong, repliserte Knut, utan å vinne merkbart gehør hos dommaransvarleg i klubben, Steinar Holvik.

– Idretten har gitt meg mykje

Knut Stavang er sjølvsagt æresmedlem i STIL og har motteke ei rekkje heidersteikn frå klubb og krets gjennom åra.

– Idretten har gitt meg mykje, og fotballen har gitt meg ei rik tid. Som lensmann hadde eg også stor nytte av at eg gjennom idretten hadde ei brei kontaktflate mot barn og ungdom, seier Knut, over 70 år etter at han første gong presenterte seg på idrettsbana.

70 år er også skilnaden i alder ned til dei yngste dommarrekruttane i STIL, der 16-åringane Mathias Rauset, Tobias Eimhjellen og Andreas Skeistrand Bakkelid er nye i dommardrakta denne sesongen, saman med Sebastian Uribes og John Henning Gotteberg. Av desse har Andreas Skeistrand Bakkelid allereie debutert som linjemann i seniorfotballen i krinsen.