Anita og julepynten

I 33 år har Anita Mykland pynta til jul på Gloppen Hotell.

– Det er ein del kasser, seier Anita og ser over bordet med julepynt på eitt av møteromma på hotellet.

Ho leitar litt og finn ei nissedame som ho og kollega Therese er einige om har vore på huset i mange år.

Erfaren julepyntar

– Den kan vi kanskje setje i resepsjonen, spør hotelldirektør Birgith Hjelle Roset.

Saman med Anita har ho sett av dagen til å lage hotellet juleklart.

– Vi har allereie hatt eitt julebord, men sesongen startar for alvor no i slutten av november. Då må vi få pynta skikkeleg til jul, smiler ho.

Mykland har vore trufast mot arbeidsplassen sin i tre tiår, og har ingen planar om å slutte med det første.

– Eg rekna meg fram til at det var 33 år fordi Preben var akkurat fødd det første året eg pynta, seier ho, og siktar til den tidlegare hotelldirektøren Preben Moen.

– Full veke

Den arbeidsame, vesle dama kjenner gongane på det ærverdige hotellet i Sandane sentrum svært godt, og det er tydeleg at folka der kjenner henne.

Med smil, kommentarar og bestemt gange bevegar ho seg gjennom stovene på hotellet.

– Eg jobbar her tre dagar i veka, så er eg dei to andre på vaskeriet i Movia. Full veke, seier ho, og legg til:

– Men eg har fri laurdag og søndag, det er eg glad for.

God hjelp

I tillegg til den årlege julepyntinga, hjelper Anita til med reinhaldet på hotellet.

– Ho er til god hjelp for dei som vaskar på romma, der ho hjelper til med det dei treng, seier Roset.

– Vi er veldig glade for å ha Anita her, understrekar ho.

Godt humør

Dei to jobbar godt i lag, og arbeidsfordelinga verkar for å gå saumlaust; med humoristiske innspel frå begge sider.

For i møte med ei som har 33 års julepynterfaring på baken, må hotelldirektøren av og til føye seg litt.

– Ja, vi veit begge kva vi vil, men blir stort sett einige. Alt kan ordnast med litt justeringar, smiler Roset.

Godt lag

Når dagen er ferdig, skal hotellet vere ferdig pynta og klar til å ta imot julebordsgjestene. Men fram til då er det ei uendeleg rekkje med julekuler som skal hengast opp, dekorasjonar som skal lagast og nissar som skal finne sin heilt eigen plass.

Med Anita med på laget skal nok det gå bra.