Vestland Høgre vil sjå på fredinga av 58 verna vassdrag
Vestland Høgre vil vurdere på nytt alle elvar som i dag er verna.
Høgre har tidlegare foreslått å av-verne ti norske vassdrag som ligg i Trøndelag, Nordland og Vestland. No vil programkomiteen i Vestland Høgre gå gjennom fredinga av alle 58 vassdrag som er omfatta av vern i fylket, skriv NRK Vestland.
Det konkrete forslaget seier : «Ingen verna vassdrag bør vere varig fritekne ny gjennomgang. Alle bør vurderast på nytt med tanke på ny teknologi, potensielle skånsame utbyggingar og flaumdemping.»
Artikkelen held fram under annonsen.
– Ny teknologi, klimaspørsmålet og kraftbehovet gjer at det er heilt naturleg å vurdere alle verna vassdrag på nytt, seier Elias Eide, medlem i programkomiteen i Vestland Høgre, til NRK.
Forslaget har ført til reaksjonar frå dei som vil verne om vassdraga.
– Om Høgre er uroa for auka energibehov, kan dei heller undersøkje nye løysingar som havvarme og bølgjeteknologi, seier Ottar Hov til kanalen.
Han er turistvert på Gaularfjellet og har engasjert seg i arbeidet mot kraftutbygging i Gaularvassdraget i fleire år.
– Dette forslaget er historielaust, kunnskapslaust og trist, seier Alfred Bjørlo i Venstre.
(©NPK)
