Vedum: Politi, sjukehus og forsvar hovudpunkt i nasjonalbudsjettet
Finansminister Trygve Slagsvold Vedum (Sp) seier tryggleik i samfunnet og arbeidsplassane til folk er hovudprioriteten i revidert nasjonalbudsjett.
Få timar før budsjettet blir lagt fram, stiller Vedum i NRKs Politisk kvarter.
På spørsmål om han legg fram eit budsjett som skal dempe prisveksten, svarer finansministeren at det er eit budsjett som skal få Noreg trygt gjennom situasjonen.
Artikkelen held fram under annonsen.
– Det skal gi tryggleik til arbeidsplassane for folk. Vi skal sikre aktiviteten i sjukehus, politi, forsvar. Og så er det eit heilt nytt element i tillegg i dette budsjettet: Etter vedtak i Stortinget set vi av endå meir pengar til å styrkje forsvaret i Ukraina, og bistand og solidaritet med det ukrainske folket, seier Vedum.
Frå før er det kjent at ekstrautgiftene i samband med Ukraina-krigen aukar med 22,4 milliardar kroner.
Her i landet blir det mellom anna sett av 338 millionar kroner ekstra for å oppmuntre kommunane til å ta imot fleire flyktningar.
(©NPK)
