UD vil vite kvar du reiser på ferie i utlandet
Nordmenn reiser samla sett mykje til utlandet gjennom eitt år, men det er berre eit fåtal som registrerer reisa si hos Utanriksdepartementet.
Det er UD som har ansvaret for å kome i kontakt med og hjelpe nordmenn i utlandet dersom det skulle skje ein katastrofe.
– Av dryge åtte millionar utanlandsreiser i året er det kanskje éin prosent som registrerer seg hos oss. Det er for lite, seier Thomas Stangeby til NRK. Han er leiar for operativt senter i UD som har ansvaret for kriseramma nordmenn i utlandet.
Stangby meiner at også korte helgeturar til nabolanda våre bør registrerast.
– Alvorlege hendingar kan skje overalt og vi ønskjer ikkje å utelukke nokon land frå registrering, seier Stangeby.
På nettstaden reiseregistrering.no, som vart oppretta i 2011, kan reisande nordmenn enkelt registrere kontaktopplysningane sine for at UD lettare skal kunne få tak i dei i utlandet.
Stangeby kan ikkje seie sikkert kvifor nordmenn vel å ikkje registrere utanlandsreisene sine.
– Det kan vere at ordninga er for lite kjent, og så kan det vere at nordmenn ikkje ønskjer å registrere kontaktopplysningane sine hos styresmaktene.
Han slår derimot fast at det ikkje er sensitiv informasjon som vert lagra, men enkel kontaktinformasjon som namn og telefonnummer, reisestad og reiselengde. (©NPK)