Tilskotsordninga til bøndene ved produksjonssvikt blir auka med nesten 700 millionar kroner
Totalt vil det utbetalast 800 millionar kroner i 2024 til bønder som har søkt tilskot for produksjonssvikt. Løyvinga blir auka med 698 millionar kroner.
– Mange bønder stod i fjor i ein svært vanskeleg situasjon etter ein krevjande sesong med tørke, og deretter store nedbørsmengder og flaum, seier landbruks- og matminister Geir Pollestad (Sp) i ei pressemelding.
Produksjonssviktordninga skal bidra til å redusere det økonomiske tapet til bøndene. Som følgje av vêrsituasjonen i fjor, søkte svært mange bønder om tilskot gjennom ordninga.
Artikkelen held fram under annonsen.
Ein stor del av utbetalingane skjer i år, og det er derfor regjeringa i revidert nasjonalbudsjett vil auke løyvinga til ordninga med 698 millionar kroner.
Ifølgje tal frå Landbruksdepartementet hadde norske bønder sendt nesten 7500 søknader om tilskot innan fristen i fjor. Det er sju–åtte gonger over normalt.
Auken kjem også av at regjeringa i fjor innførte nye satsar og heving av taket for maksimalt tilskot ved produksjonssvikt. (©NPK)
