Stortinget sa nei til omkamp om sjødeponi

Stortingsfleirtalet avviste torsdag omkamp om etablering av sjødeponi i Førdefjorden i Sogn og Fjordane og Repparfjorden i Finnmark. Det skal vere høg terskel for å gjere om forvaltingsvedtak, var gjennomgangsmelodien i Stortinget.

KrF valde likevel saman med MDG å støtte representantframlegget frå SV om å behandle gruvedeponi-løyvet til Nordic Mining i Førdefjorden i Sunnfjord på nytt. Løyvet til gruvedeponiet i Kvalsund i Finnmark var det derimot berre SV og MDG som gjekk inn for å behandle på nytt.

Ap, Høgre, Frp, Sp og Venstre gjekk alle imot ein omkamp om sjødeponia og forkasta framlegget frå sju SV-representantar.

Saksordførar Tore Storehaug (KrF) la ikkje skjul på at dette er ei nær sak for han som son av ein fiskar frå Førdefjorden. Han la stor vekt på at gruveprosjektet i Engebøfjellet i Naustdal har endra seg mykje etter at Nordic Mining fekk løyve til å etablere sjødeponi i fjorden i 2016.

– Mellom anna er rutil no eitt av to produkt ein skal ta ut. Prosjektet har gått frå vere eit reint rutil-prosjekt til no å vere eit rutil- og granat-prosjekt. Talet på arbeidsplassar som blir skapte, er ganske kraftig nedjustert, driftstida er nedjustert, mens lengda på dagbrotet er oppjustert, sa Storehaug i Stortinget.

I Kvalsund har det derimot ikkje komme fram ny informasjon som har endra føresetnadene for gruvedrifta og sjødeponiet der, meiner KrF.

Leiaren i energi- og miljøkomiteen, Ketil Kjenseth (V), peika på at SV og Venstre før har stått saman om dei to fjord-deponia, men at forvaltingsvedtaket no er gjort. Kjenseth meinte forslaget frå SV eigentleg er ein test på i kva grad Venstre er i stand til å utfordre regjeringa innanfrå.

– Forslaget frå SV er i realiteten ein omkamp, der ein testar ut om Vestre i regjering kan klare å stoppe eit stort fleirtal i Stortinget og ta ein omkamp innanfrå i regjeringa, sa Kjenseth.

Partifelle og klima- og miljøminister Ola Elvestuen gav i Stortinget ingen signal om indre opprør i regjeringa, snarare tvert om.

– Vedtaka om å gi løyve i desse to sakene er allereie tatt, og generelt er det høg terskel for å gjere om på forvaltingsvedtak. Det har ikkje komme fram nye opplysingar som gir grunnlag for å behandle sakene heilt ut på nytt, sa Elvestuen.

Miljøministeren viste likevel til at spørsmålet om sjødeponi er grundig drøfta i Jeløya-erklæringa. Der heiter det at regjeringa skal lage ei utgreiing om konsekvensane av eit framtidig forbod mot sjødeponi, og det skal ikkje delast ut nye sjødeponiløyve i denne stortingsperioden. Regjeringa skal dessutan evaluere minerallova for å sikre at miljøomsyna er godt nok varetatt der.

– Dette er ny politikk som eg er godt fornøgd med, slo miljøministeren fast.

Forslagsstillar Lars Haltbrekken (SV) måtte konstatere at Venstre ikkje så lett snur i regjering, heller ikkje når det er nye opplysningar i saka.

– Kva skal til for at Venstre og regjeringa snur i spørsmålet om å tillate at Førdefjorden og Repparfjorden blir nytta som søppelplass for gruveindustrien? spurde Haltbrekken.

– Slik det er no, har det ikkje komme opp nokon endringar som er store nok til at det er grunnlag for å ta saka opp på nytt. Det må store endringar til for å gi grunnlag for å ta saka opp på nytt, svarte Elvestuen, som elles ikkje kunne seie noko meir om kva endringar som eventuelt kunne vere store nok. (©NPK)