Mange nordmenn er i år tidleg ute for å sikra seg feriehus ved sjøen. Illustrasjonsfoto: Geir Olsen/NTB/NPK.

Stor rift om norske sommarhus

Mange som leiger ut sommarhus og hytter i Noreg opplever no større pågang enn nokon gong.

– Heilt vilt og ei tredobling i talet på leigekontraktar samanlikna med same tid i fjor, seier kommersiell direktør for reise Terje Berge hos Finn.no til NRK.

Han fortel at mange av sommarhusa allereie er utleigde. I alle fall om du er på jakt etter høg standard og hus eller hytte ved sjøen.

Dei mest attraktive sommarhusa ligg på Sørlandet, Telemark og Østfold. Mange er villige til å betala dyrt for å sikra seg feriehuset dei ønskjer seg. For feriebustader i prisklassen frå 70-110.000 kroner veka er det ifylgje kanalen knapt fleire ledige hus att.

Også hotell og andre overnattingsstader på Sørlandet merkar at nordmenn er tidleg ute med å planleggja sommarferien. Synnøve Elisabeth Aabrekk i reiselivsklyngja USUS seier likevel at det framleis er god plass, men oppmodar folk til ikkje å venta for lenge før dei bestiller.

(©NPK)