Trass i noko synkande temperaturar, blir det framleis bra vêr på Sør- og Austlandet dei kommande dagane. Arkivfoto: Vegard Wivestad Grøtt/NTB/NPK.

Sør- og Austlandet er vêrvinnarane dei kommande dagane

Meteorologisk institutt spår lange periodar med sol mot helga på Sør- og Austlandet.

Meteorologisk institutt melder at det no skjer eit vêromslag. Det fine vårvêret i heile landet blir dei neste dagane erstatta av kjølig nordavind og lågare temperatur, skriv dei på Twitter.

Men det betyr ikkje at det no blir dårleg vêr i heile landet. Variert er stikkordet dei neste dagane. Vêret byr på nattefrost, snø, mykje sol og regn.

– Finvêret held fram i Søraust-Noreg, sjølv om ein kan rekne med noko skya vêr fram mot helga, seier vakthavande meteorolog Martin Granerød ved Meteorologisk institutt til NTB.

Brann og snøfare

Det er framleis tørt og gras- og lyngbrannfare austafjells, og Meteorologisk institutt avviser ikkje at det kan bli sendt ut farevarsel fleire stader i landet den kommande veka. Granerød minner om det generelle bålforbodet mellom 15. april og 15. september.

April er òg ein månad der det framleis er utrygt for snø i fjellet. Det er derfor viktig at ein ikkje skiftar til sommardekk for fort viss ein har planar om å køyre over fjellet.

– Ein skal ikkje gløyme at april kan by på mange overraskingar vêrmessig. Sjølv om vêret fleire stader ser bra ut no, er det ingen garanti for at det ikkje blir snø òg i lågt terreng framover.

Det er derfor både håp for skientusiastar som ikkje har lagt skia heilt på hylla enno, og dei som drøymer om sol og piknik i parken.

Forventa vêrskifte

– Vestlandet kan òg vente seg ei vêrforbetring. Sjølv om vêret no startar med byer, blir det betre og betre mot helga. Midt-Noreg må derimot belage seg på regn og sludd i låglandet framover, fortel Granerød.

I nord ser torsdagen bra ut, men det blir òg her meir byer, sludd og snø gjennom helga. Granerød meiner likevel at det alt i alt ikkje ser så verst ut framover.

– Med både eit høgtrykk og eit lågtrykk som kjem inn over landet, kan vêret likevel skifte fort, påpeikar meteorologen.

Artikkelen held fram under annonsen.

(©NPK)