Småbrukarlaget godkjenner jordbruksavtalen
Norsk Bonde- og Småbrukarlag godkjenner jordbruksavtalen etter styremøte torsdag.
I eit vedtak skriv organisasjonen at forhandlingsutvalet gjekk ut over både etablert praksis og mandatet sitt ved å skrive under på avtalen før styret hadde godkjent denne.
Forhandlingsutvalet bestod av leiar Kjersti Hoff og politisk nestleiar Eli Berge Ness. Dei fekk fleirtal i styret for å gå inn i sluttforhandlingar, noko som vart tolka som ei fullmakt til å gå inn for ein avtale, skriv Nationen.
Artikkelen held fram under annonsen.
I etterkant har fleire reagert på at avtalen vart underteikna utan at styret fekk stemme over han først.
Fleire styremedlemmer i Norsk Bonde- og Småbrukarlag fortalde til NRK denne veka at avtalen vart skrive under utan godkjenning av styret.
Jordbruksavtalen kom i hamn måndag. Den enda på rekordhøge 10,9 milliardar kroner og inneber mellom anna at bøndene får full dekning for dei ekstraordinært høge kostnadene til mellom anna gjødsel i år og neste år, og at inntektsgapet blir tetta med 40.000 kroner.
(©NPK)