I Oslo har det vore lange køar utanfor Vinmonopolet på grunn av avgrensingar på kor mange kundar som kan vere i butikken samtidig. Vinmonopolet ventar rekordsal i desember på grunn av stengde grenser. Foto: Håkon Mosvold Larsen/NTB.

Rekordtal for Vinmonopolet i desember

Vinmonopolet har hatt ein vekst på 28 prosent så langt i desember, skriv E24, og enno står dei to mest hektiske vekene i året att.

Hittil i desember har dei hatt 1,4 millionar kundar på landsbasis, mot 1,1 millionar kundar på same tid i fjor.

Det svarer til ein vekst på 28 prosent.

– Salet i desember vil bli historisk for Vinmonopolet, grunna stengde grenser og ingen taxfreehandel, seier Elisabeth Hunter, administrerande direktør i Vinmonopolet, til E24.

Ifølgje Hunter er dei to siste vekene før julaftan dei mest hektiske vekene for Vinmonopolet, og vesle julaftan er den desidert travlaste dagen i året.

– Det er vanskeleg å seie korleis dei neste to vekene vil sjå ut. Sjølv om fleire kundar har vore innom, er vi jo ikkje sikre på om dei har gjort unna heile julehandelen.

(©NPK)