Rekord i talet på smittetilfelle førre veke

I veke 11 var det ein førebels rekord i talet på koronatilfelle. I alt fekk 6.328 personar påvist koronasmitte, skriv FHI i den siste vekerapporten sin.

Det er det høgaste talet melde tilfelle på ei veke sidan starten av pandemien, skriv Folkehelseinstituttet (FHI) i rapporten.

Talet er noko lågare enn det som kjem fram av FHIs statistikk, som viser at 6.505 personar fekk påvist smitte førre veke.

Talet er 12 prosent høgare enn i veke 10, men auken i talet på melde tilfelle er likevel litt mindre bratt enn i førre veker, ifølgje FHI.

Samtidig har talet som testar seg, hatt ein svak nedgang på 2 prosent, medan delen positive prøver har auka frå 1,52 prosent i veke 6 til 3,34 prosent i veke 11.

189.737 nordmenn testa seg for covid-19 førre veke.

(©NPK)