Pollestad vil ha meir norsk frukt og grønt
Korleis kan vi auke produksjonen og forbruket av norske grønsaker, potet, frukt og bær? Landbruks- og matminister Geir Pollestad har møtt frukt- og grøntnæringa for å få deira syn på saka.
– Målet er å auke verdiskapinga for bonden og betre tilgangen på norsk frukt og grønt for forbrukaren. Frukt- og grøntnæringa har stort potensial for vekst, og merksemd rundt kosthald og helse gjer at dette er varer som det truleg vil bli meir etterspurnad etter, seier Pollestad i ei pressemelding.
I møte med Pollestad lyfta Gartnerhallen, Gartnarforbundet, Nordgrønt, Produsentforeningen 1909 og Bama fram fleire tiltak som dei meiner vil vere med på å auke den norske produksjonen, og gi auka del av norske varer i marknaden.
Artikkelen held fram under annonsen.
Det var snakk om tiltak som risikoreduksjon for bønder, styrking av bonden sin posisjon i verdikjeda, øyremerking av IBU-midlar til teknologiutvikling og tydelege føringar for at norske varer blir prioriterte i offentlege innkjøp.
– Eg fekk gode innspel til det vidare arbeidet med å auke norsk grøntproduksjon. regjeringa har prioritert denne næringa i dei to siste jordbruksoppgjera, både med styrking av tilskot til bonden og verkemiddel til forsking og utvikling, seier Geir Pollestad. (©NPK)
