– Planlegginga av Byrkjelo – Sandane må starte snarast

Anders Ryssdal er ordførar i Gloppen og medlem i fylkesutvalet i Sogn og Fjordane, medan Olin Johanne Henden (H) er fylkestingsmedlem for Høgre og medlem i samferdsleutvalet. Begge er sterkt uroa etter at FrP-representanten Frank Willy Djuvik under det siste fylkestinget opplyste at planlegginga av indre trase for E39 skal starte komande år.

Bli gløymt
Dei fryktar dermed at strekninga Byrkjelo – Sandane kan bli liggande utan at nødvendig opprusting blir gjennomført, og dermed bli ”Den gløymde vegen”.
Dei viser til møte med samferdsleminister Ketil Solvik Olsen 7. juli og brev av 14. juli om denne vegstrekninga der det vart peika på behovet for opprusting. No er statsbudsjettet for 2015 lagt fram, men ingenting tyder på at det er sett av midlar til dette, peikar Ryssdal på. Begge meiner statsråden må gje Vegvesenet beskjed om å starte planlegginga.

– No får vi 20 minutts avgangar på sambandet Anda – Lote seinast i 2017. Det har vi stått på for. Trafikken på dagens E39 kjem til å auke, seier Olin Johanne Henden.

Før tunnel
Fleire stader på strekninga Byrkjelo – Sandane er vegen smal, svingete og ulukkesbelasta, seinast var det ei ulukke på Eide for ei veke sidan der tre bilar var involverte.

– Trafikken kjem støytvis i samband med ferja. Her er mykje gjennomgangtrafikk, og endå meir interntrafikk, peikar Ryssdal på. Dei viser til at dagens E39 gjennom Gloppen blir liggande som europaveg i minst ti år framover.

– Vi håpar på eit samla trykk frå heile fylket i denne saka. E39 er den viktigaste vegen på heile Vestlandet. Opprustinga av Byrkjelo – Sandane må kome før arbeidet med tunnel gjennom Utvikfjellet og indre trase startar, krev Olin Johanne Henden og Anders Ryssdal. Førstnemnde har spelt saka inn overfor sine partifellar sentralt.

På høg tid
Anders Ryssdal opplyser at dagens veg frå Byrkjelo til Sandane i store trekk går slik han vart bygd i 1936. Det gjeld t.d. både Gullkista i Breimsfjellet og Jarbru – Eide.

– Einaste skilnaden er at det er kome opp støypekant i Gullkista og rekkverk på Eide, seier Ryssdal. I brevet til samferdsleministeren er det peika på fem aktuelle tiltak. Dei største og mest kostnadskrevjande er 1km lange tunnelar forbi Jarbru – Eide og Gullkista til ein kostnad på 200-360 mill. kroner.

I tillegg er det nemnt enkel breiddeutviding frå Gulliksta til Reed med 20-40 mill. kroner, Reed sentrum med 15-20 mill. og skulder for gåande og syklande på strekninga Byrkjelo – Reed for 45-90 mill. kroner. Dersom ein legg maksimalbeløpet til grunn for alle tiltaka, blir det over ein halv milliard kroner.