På taket på Kleivedammen

Ein personbil hamna på taket på Kleivedammen i ettermiddag. Det førte til full utrykning av nødetatane.

Uhellet skjedde litt før klokka 15.00. Ein bil på veg til Sandane hamna på taket. Spor på staden kunne tyde på at bilen først hadde vore utfor vegbana og vore i fjellveggen før han vart tippa over og rulla rundt. Den eine vegbana vart sperra.

Det var ein person i bilen. Vedkomande kom seg ut på eiga hand og vart frakta vekk i ambulanse. Etter det som vart opplyst på staden, var vedkomande i bra form.

Gloppen brann og redning var raskt på plass. Personbilen vart sikra, og eine vegbana opna for trafikk etter kort tid. Mannskap frå Gloppen brann og redning tok seg av trafikkdirigeringa til bilen vart fjerna. Også politiet i Gloppen var på staden for å registrere det som var skjedd.