Noreg kjøper fleire radaranlegg
Noreg kjøper tre radaranlegg til for militær luftromovervaking frå Lockheed Martin. Dei skal plasserast på Senja, i Målselv og på Nordkapp.
Forsvarsmateriell inngjekk i november 2022 kontrakt med Lockheed Martin om leveranse av åtte radarar med opsjon på tre radarar til. No er denne opsjonen utløyst, opplyser Forsvarsmateriell.
– Kampfly, missil og dronar er ein viktig del av moderne krigføring. Det er derfor avgjerande at vi har system som kan følgje med i dette domenet. Ikkje berre for oss sjølve, men også for forbundsfellane våre i Nato. Dei tre nye radarane skal til Senja, Målselv og Nordkapp og vil forbetre synet vårt i nord betrakteleg, seier forsvarsminister Bjørn Arild Gram (Sp).
Artikkelen held fram under annonsen.
Det tre radarane som no blir bestilte av Lockheed Martin, er av same type som dei åtte som allereie er sette i bestilling og skal erstatte dei som i dag blir omtalte som Sindre II-radarar.
Total prosjektperiode, som opphavleg var sett til ferdigstilling i 2030, vil forlengjast noko som følgje av denne opsjonsutløysinga, men elles er prosjektet i rute, ifølgje Forsvarsmateriell. (©NPK)
