Natur og Ungdom varslar fleire og større aksjonar
Leiaren i Natur og Ungdom seier at aksjonar er billigare enn rettssaker, etter at miljørørsla tapte saka om Førdefjorden i Oslo tingrett. Han varslar fleire og større aksjonar framover.
Natur og Ungdom og Naturvernforbundet har til saman brukt 4,4 millionar kroner i rettssaka mot staten, som gav løyve til sjødeponi i Førdefjorden.
– Me kunne betalt bøter for 400 aksjonistar for pengane me har brukt i rettssaka, seier leiaren i Natur og Ungdom til NRK.
Artikkelen held fram under annonsen.
Dei har no planar for langvarige aksjonar, skriv allmennkringkastaren.
Gruveselskapet Nordic Mining er allereie i gang med bygginga av gruveanlegget i Førdefjorden, men Natur og Ungdom har ikkje gitt opp kampen for å stansa gruvedeponi i Førdefjorden og Repparfjorden i Finnmark.
– Vi spør oss sjølve om rettssaker som denne er det rette verkemiddelet. Vi ser no at aksjonar er langt billigare.
Direktør i gruveselskapet Nussir, Øystein Rushfeldt, meiner rettssaka i Oslo tingrett berre bidreg til konflikt og ikkje til dialog. Han håpar staten og miljøvernorganisasjonane set seg ned saman for å komma nærare ei felles forståing og løysing.
– Dei einaste vinnarane som kjem ut i pluss er overbetalte advokatar med adresse i sentrale strøk, seier Rushfeldt. (©NPK)
