Grimsdalshytta. Foto: Kari Merete Horne/DNT.

Meir lokal mat på DNT-hytter

Denne sommaren har Den Norske Turistforening og Norges Bondelag samarbeidd om å auke bruken av lokale råvarer på turisthytter.

DNT meiner berekraftig mat, naturopplevingar og matopplevingar går hand i hand og har fått Bondelaget med på laget i eit spesielt matprosjekt. Offisiell bondelagskokk, Halvar Ellingsen, har i år vore innom Aurlandsdalen turisthytte, Grimsdalshytta og Stranddalen turisthytte i Ryfylkeheiane for å gi tips og råd.

– Dette er eit fint prosjekt, og eg håper dei tre hyttene har hatt utbytte av det, seier kokk Halvar Ellingsen på nettsidene til Bondelaget.

Besøka har inspirert til å bruke kortreiste råvarer og produkt i endå større grad – og på ein endå betre måte. Turistforeiningshyttene har ulike utfordringar, for eksempel logistikk og lagerkapasitet.

Mange DNT-hytter samarbeider med lokale bønder om beiting, dyrehald og råvarer.

– Det bør kjennast på smaken kvar i landet du er, og kva sesong det er. Derfor samarbeider vi med DNT om meir lokal og berekraftig mat, seier Sigrid Hjørnegård, generalsekretær i Norges Bondelag.

(©NPK)