Litt betring i vassmagasina
Fyllingsgrada i vassmagasina i Noreg er framleis langt under det vanlege, men var noko betre i veke 44 enn veka før.
Noregs vassdrags- og energidirektorats statistikk viser at for landet samla sett er fyllingsgrada 72,2 prosent. Det er 0,8 prosentpoeng høgare enn veka før, men framleis 11,4 prosentpoeng lågare enn medianen for veke 44.
Det er framleis i elspotområde 2 at situasjonen er mest dramatisk. Dette området omfattar sørlege delar av Viken, mesteparten av Vestfold og Telemark, Agder, Rogaland og sørlege delar av Vestland, og her er fyllingsgrada heilt nede på 63,7 prosent. Det er over 20 prosentpoeng lågare enn medianen.
Artikkelen held fram under annonsen.
Vindkraftproduksjonen i heile Europa var svært låg gjennom store delar av førre veke, og Noreg eksporterte store mengder straum. I helga auka vindkraftproduksjonen, og Noreg vart derfor nettoimportør av straum.
(©NPK)
