Firda-elevar med digital innsamling til viktig sak

Firdarussen sin årlege innsamlingsaksjon, Krafttak mot kreft, er i år heildigital som følgje av smittesituasjonen i samband med koronapandemien.

Tidlegare år har russen banka på dørene til innbyggjarane i heile kommunen for å samle inn pengar til kreftsaka. I år er det, som så mykje anna, ein annleis aksjon.

Synleg digitalt

– Vi fekk ikkje lov til å gå dør til dør i år på grunn av koronasituasjonen, sjølv om vi ikkje har så mykje smitte her i forhold til mange andre plassar i landet. Difor har vi brukt sosiale medium så mykje som vi klarer. Vi har vore ute på Facebook, Instagram, hengt opp plakatar, og prøvd å gjere oss så synlege som mogleg, seier Marit Mardal, som er årets organisator for Firdarussen sitt Krafttak mot kreft.

Sjølve aksjonsdagen var sist tysdag, men det er framleis mogleg å donere pengar til russen si digitale bøsse på Kreftforeininga sine sider.

Mardal ser utfordringane med å få til det same engasjementet og vekke den same gjevargleda når dei ikkje får gå med bøssene rundt til folk, men er likevel lett håpefull.

– Vi skjøner at det er vanskeleg å få inn like mykje når vi ikkje kan vere tradisjonelle bøsseberarar, men vi håpar at vi kan vere med å bidra til å få inn ein god sum til kreftforskinga likevel, seier ho.

Smitteomsyn

Det var Kreftforeininga nasjonalt som tok avgjerda om å avlyse den fysiske innsamlinga. Opphavleg var planen å gjennomføre ein dør-til-dør-aksjon med strenge smittevernreglar. Dei 20.000 bøsseberarane skulle ikkje ta imot kontantar, men formidle vippsnummer og andre betalingsmåtar.

– Smittsame mutasjonar og skjult smitte gjer situasjonen meir uoversiktleg enn kva vi hadde sett føre oss. Vi ønskjer ikkje å ta nokon sjansar i dagens koronasituasjon, og kjem difor ikkje til å sende ut våre frivillige frå dør til dør for å samle inn pengar til kreftsaka, seier distriktssjef i Kreftforeininga, Geir Vangsnes, i ei pressemelding.

Låg overleving

Pengane som blir samla inn under aksjonen i år skal gå til forsking på kreftformer med låg overleving.

– Nokre kreftformer er det svært få som overlever. Det ønskjer vi å endre på. Føremålet er ekstra viktig no som verdas helsesituasjon i stor grad er prega av koronapandemien. Kreft tar aldri pause, heller ikkje under ein pandemi. Difor håpar eg alle vil vippse ei gåve til livsviktig kreftforsking, seier distriktssjefen.