Kikk litt ekstra etter gulsporven i år
Gulsporv er av Norsk Ornitologisk Forening plukka ut som Årets fugl 2021. Grunnen er at arten dessverre er i tilbakegang.
Som hekkefugl er gulsporven utbreidd over det meste av landet, og i alle fylke, fortel NOF på nettsidene sine.
At gulsporven likar så godt korn er nok ein viktig faktor for utbreiing og førekomst. Dessutan finst han ofte i tilknyting til dyrehald, og då særleg hest, som også likar havre veldig godt.
Artikkelen held fram under annonsen.
Men bestanden er i klar nedgang i Noreg. Arten er derfor kommen på den norske raudlista i kategorien «nær trua» (NT). Også i nabolanda våre, inkludert Finland, Sverige, Danmark og Storbritannia, er gulsporven raudlista.
Med valet av gulsporv som Årets fugl ønskjer NOF at du kikkar ekstra godt etter han i 2021. Gulsporv er ein art som dei fleste enkelt kan få sjå, noko du kan begynne med allereie i januar under NOFs tradisjonsrike hagefuglteljing. Vidare vil det også bli høve til å bidra i ei nasjonal kartlegging.
NOF oppfordrar alle til å ta ein runde i nærområdet sitt for å registrere syngjande hannar i mars-mai. Resultata vil bidra til å kunne skaffe eit betre og oppdatert bestandsestimat for arten, basert på tettleiksestimat i utvalde regionar og i ulike leveområde.
Kartlegging av hekkeplassar og kva naturlege omgivnader desse finst i, vil gi fokus på habitatpreferansar, som er viktig for å belyse kva som skal til for å ta vare på arten.
(©NPK)
