Jon Askeland (Sp) nominert til attval, Klakegg på 6.-plass

Senterpartiet nominerer Jon Askeland frå Alver til attval som fylkesordførar i Vestland. Jølstringen Oddmund Klakegg står på 6.-plass på nominasjonsnemnda sitt listeframlegg.

Askeland toppar vallista til neste års fylkestingsval føre Aleksander Øren Heen, Årdal, Sigrid Brattabø Handegard, Ullensvang, Sigurd Reksnes, Stad og ungdomskandidat Tonje Såkvitne, Voss, på dei neste plassane.

Lista er samrøystes frå nominasjonskomiteen.

– Har vist handlekraft

– Jon Askeland er ein samlande kandidat som kjenner heile fylket godt. Han er kunnskapsrik, har brei politisk erfaring og har som fylkesordførar i Vestland vist handlekraft og skapt tryggleik i krevjande tider, seier leiaren i nominasjonskomiteen Jenny Følling, i ei pressemelding.

Nominasjonsnemnda har gjennomført ein omfattande prosess med intervju av 17 kandidatar som var aktuelle høgt på lista, som inneheld totalt 71 namn.

– Vi er heldige som har så mange dyktige folk i Senterpartiet som er interesserte i å stille seg til disposisjon og ta ansvar for utviklinga av Vestland fylkeskommune dei komande åra, seier Følling.

To frå Gloppen

Senterpartiet har ti plassar i dagens fylkesting. På 6.-plass og tilsynelatande «sikker» plass, finn vi tidlegare Jølster-ordførar Oddmund Klakegg.

Steffen Fjellestad frå Gloppen har fått 10.-plassen på listeframlegget, sambygdingen Karoline Bjerkeset 12.-plassen.

Vidare finn vi sunnfjordingane Emma Berge Ness og Erlend Haugen Herstad på høvesvis 13.- og 15.-plass.

Nina Elise Hjartholm, Sunnfjord, står på 30.-plass, Pernille Nedrebø, Gloppen, på 39.-plass.