Informasjonsmøte om E39 Bjørset-Skei

I samband med at vegutbygginga mellom Bjørset og Skei starta opp denne månaden inviterer Statens vegvesen til ope informasjonsmøte på Thon Hotel Jølster onsdag.

På møtet vil Vegvesenet informere om arbeidet som no er i gang, og om planlagd framdrift på prosjektet. Dei vil òg gjere greie for trafikkavvikling og moglege ulemper for busette og trafikantar gjennom byggjeperioden. Representantar for hovudentreprenøren, Implenia Norge AS, vil òg vera til stades.

Ope for spørsmål

- Det er viktig for oss å få til god og kontinuerleg kommunikasjon med folk i området gjennom heile den tida bygginga går føre seg, seier prosjektleiar Svein Reidar Dale. Informasjonsmøtet er eit godt høve for oss til å nå ut med relevant informasjon, og for folk som blir påverka av prosjektet til å få svar på spørsmåla dei måtte ha. Me oppfordrar alle interesserte til å komma på onsdag.

Betre og tryggare veg

Utbygginga mellom Bjørset og Skei omfattar til saman 11 km bilveg, og skal stå ferdig sommaren 2019. Den nye vegen skal om lag følgje same linja som dagens E39, men blir breiare og får mykje betre standard med gul midtstripe. I tillegg skal det byggast 6,5 km gang- og sykkelveg, som skal gå parallelt med bilvegen mellom Skei og Årdal.
- Vegen kjem til å bli mykje betre, og ikkje minst tryggare, både for folk som bur i området og for gjennomreisande, slår Dale fast.