Idretten og frivilligheita får lik straumstøtte som hushaldningar
Regjeringa foreslår å auke straumstøtta til idrett og frivilligheit til 90 prosent over 70 øre per kWt i perioden oktober 2022 til desember 2022.
Straumstøtta held då fram med å vere på same nivå som for hushald, skriv regjeringa i ei pressemelding til NTB.
– Denne auken er særleg etterspurt av Norges idrettsforbund, men han kjem heile frivilligheita til gode. Vinteren kjem til å bli tøff for alle, men med dette får idretten og frivilligheita ei ekstra draghjelp, seier kultur- og likestillingsminister Anette Trettebergstuen.
Artikkelen held fram under annonsen.
Dagens straumstøtteordning til idretten og frivilligheita opnar for å dekkje 80 prosent av utgiftene som overstig 70 øre per kWt. Norges idrettsforbund har bede om å få dekt 90 prosent av alt som kjem over 50 øre per kilowattime.
Tidlegare fredag kom også regjeringa med ei oppmoding til energiselskapa om å innvilge betalingsutsetjing til frivillige lag og foreiningar som ventar på å få utbetalt straumstøtte.
Opposisjonen kritiserer lengda på ordninga
Turid Kristensen, idrettspolitisk talsperson for Høgre er glad for at regjeringa endeleg har lytta til idretten, frivilligheita og opposisjonen, men meiner meir må til.
– Det kan likevel verke som om regjeringa kanskje ikkje har oppfatta alvoret i situasjonen. Det er for tidleg å avslutte ordninga allereie ved nyttår. Trettebergstuen uttaler sjølv at vinteren kjem til å bli tøff. Det gjeld også for idrettslaga og organisasjonane. Regjeringa bør gå tilbake til teiknebrettet og sørgje for ei ordning som kan gi idrettslaga og organisasjonane den føreseielegheita som dei treng og fortener, skriv Kristensen i ein e-post til NTB.
– Må gjere det vi kan
Generalsekretær Stian Slotterøy Johnsen i Frivillighet Norge meiner det er bra støtteordninga for frivilligheita held fram med å følgje same nivå som ho for hushalda.
– Dei høge straumprisane er veldig krevjande for mange frivillige organisasjonar. Vi må gjere det vi kan for at straumutgiftene ikkje tvingar organisasjonane til å avlyse aktivitetar eller at det blir dyrare å delta, seier han til NTB.
