Har fått svært god respons i marknaden

– Det har vore veldig hektisk. Responsen har vore så god at vi ser det vil gå, seier Thomas Falch Eide. 



Thomas Falch Eide er ergoterapeut. Han var tidlegare tilsett i hjelpemiddel firmaet Handicare, men i januar i fjor tok han ei viktig avgjerd. Han sa opp jobben og etablerte sitt eige firma på Sandane i same bransje, men med tilbod om andre og nyare utvikla hjelpemiddel.

Færre hender
Forretningsideen er å levere løysingar som gjer det mogeleg for fleire å greie seg lenger heime på eiga hand.

– Vi har nyutvikla og innovative hjelpemiddel og velferdsteknologi ingen andre har. Først og fremst med tenke på dei som vil klare seg i eigen heim, men vi leverer også til institusjonar der våre hjelpemiddel lettar kvardagen for brukarane og reduserer hjelpebehovet og avlastar personalet, seier Thomas. Han har treft godt med «timinga».

– Vi ser at eldre som bur heime, i framtida må klare seg lenger på eiga hand og med mindre hjelp. Vi har rett og slett ikkje nok hender. I tillegg er institusjonsbasert omsorg kostbart for samfunnet, seier Thomas Falch Eide.

Fantastisk mottaking
Han peikar på at landet rundt er eldreinstitusjonane i ferd med å fyllast opp. NAV den største kunden, men også sjukehus, helseinstitusjonar og rehabiliteringssenter er på kundelista. Ikkje minst tek mange private kundar kontakt for å gjere kvardagen enklare.

– Vi har fått ei fantastisk mottaking. Eit av produkta våre har t.d. hatt 116.000 visningar på nettsida vår, fortel han. I haust har Thomas Falch Eide vore mykje på reisefor for å vise fram produkta dei leverer.

– Alle er veldig interesserte og opne for å sjå. Produkta våre fungerer godt både til opptrening og i private heimar, seier Thomas. Eitt av dei er ein løftestol. Når brukaren lener overkroppen framover, vippar setet opp og fram slik at vedkomande greier å reise seg sjølv.

Heilt nytt
Mange som har problem med å reise seg, har også problem med å setje seg ned på ein trygg måte, men stolen har innebygd dempar som hindrar at brukaren deisar ned i setet.

– Dette er ein heilt ny type stol vi er åleine om å marknadsføre. Tenk kor mange eldre på institusjon t.d. som treng hjelp til å reise seg og setje seg. Det treng dei ikkje med denne stole, peikar Thomas på. Han er i kontakt med ein institusjon som tenkjer å møblere med denne nyvinninga som verken treng elektrisk straum eller er basert på komplisert mekanikk.

Som ergoterapeut og mange år i bransjen veit han kva behov marknaden har og kor viktig det er med kompetanse når produkta skal seljast.

Ikkje åleine
Alle stader han er til stades for å vise fram produkta, opplever han ein «wow-effekt» fordi det er nytt. Starten har vore så lovande at Thomas Falch Eide ikkje lenger er åleine i bedrifta.

– Eg har opna eit avdelingskontor i Tønsberg og tilsett ein person som også er blitt partner i bedrifta, fortel han og forklarer at Tønsberg er valt fordi området rundt Oslofjorden er tett folksett med ei rekkje store institusjonar som t.d. Sunaas, Catosenteret, Diakonhjemmet og mange andre sjukehus.

I tillegg har Hjelpemiddelpartner etablert eigen nettbutikk og tilsett ein person i deltidsstilling for å administrere nettløysinga og nettbutikken.

Fleire
Også i Gloppen har responsen vore god. Fysio- og ergoterapitenesta har t.d. vitja bedrifta og sett på utvalet av hjelpemiddel.

– Det set eg veldig stor pris på, seier han.

Resultatmessig vil det framleis ta litt tid før vi er der vi skal vere, men responsen er så god at vi ser det vil gå, og at vi kan ekspandere både her på Sandane og andre plassar.

– Alt tyder på at det går rette vegen. Det skal ikkje så mykje meir til før vi kanskje må tilsetje ein person til på den administrative sida, seier gründer Thomas Falch Eide.