Forbrukarrådet: Kommunen bør ta rekninga for matavfallet til innbyggjarane
Mengda matsvinn i landet skal drastisk ned dei neste åra. Forbrukarrådet tek til orde for å setje opp ei matavfallavgift, for å gje kommunane eit insentiv til å arbeide mot matsvinn i sitt område.
Det skriv NRK.
Mengda matsvinn i Noreg skal bli halvert innan 2030. I dag står hushalda for halvparten av all mat som blir kasta.
Artikkelen held fram under annonsen.
Ifølgje leiar for forbrukarpolitikk i Forbrukarrådet, Gunstein Instefjord, er det ikkje mogleg å få til ei avgift som gjev kvart enkelt hushald insentiv til lågare matsvinn. Det er fordi det er for mange hushald, og for komplekst å måle avfallet til eit spesifikt hushald.
Difor meiner Instefjord ansvaret burde liggje hjå kommunane.
– Dei har stort høve til å påverke matsvinnet i hushalda, seier han til statskanalen.
Forbrukarrådet ynskjer seg ei avgift som følgjer kommunegrensene, som skal følgje same mønster som for næringsavfallet. Jo meir svinn hushalda i ein kommune har, jo høgare avgift.
Saman med forbruksforskingsinstituttet SIFO og Fremtiden i våre hender, foreslår dei å leggje avgifta på kommunen.
– Vi treng lokalt tilpassa tiltak mot matsvinn, seier Instefjord. (©NPK)
