Får midlar til kunstkjøp
Regjeringa vidarefører stimuleringstiltaka for kulturlivet i 2021 som følgje av covid-19-krisa. Musea i Sogn og Fjordane får ein million kroner til innkjøp av kunst.
– Stimuleringstiltaka for kunstlivet er viktig for musea og for kunstnarane. Musea i Sogn og Fjordane får ein million kroner til kunstinnkjøp i første halvår 2021. Midlane skal gå til kjøp av samtidskunst, kunsthandverk og design, frå galleri og visingsstader i Noreg eller direkte frå kunstnaren, seier kultur- og likestillingsminister Abid Q Raja i ei pressemelding.
Stimuleringsmidlane bidreg til å gi nye oppdrag til kunstnarane.
Artikkelen held fram under annonsen.
– Vi hausta gode erfaringar i fjor då vi gav støtte til kunstmusea slik at dei kunne kjøpe inn kunst. No vidarefører vi desse stimuleringstiltaka. Rundt om i landet gir vi også auka midlar til utstillingshonorar, ei ordning som Musea i Sogn og Fjordane allereie er med i. Støtta bidreg til å skape auka etterspurnad i kunstmarknaden og større aktivitet i det visuelle kunstfeltet. Dette er gode grep som kjem både visingsstader og kunstnarar til gode i ei vanskeleg tid. Eg har registrert at fleire museumsleiarar og kunstnarorganisasjonar har stilt seg svært positive til tiltaket, seier kultur- og likestillingsministeren.
