Erling blir komitéleiar
Senterpartiet sin Erling Sande, frå Sogn og Fjordane, blir leiar av Transport- og kommunikasjonskomiteen på Stortinget.
− Gode transport- og kommunikasjonsløysingar er avgjerande for busetnad, næringsutvikling og beredskap over heile landet. Eg gleder meg til å jobbe i lag med resten av komiteen, Stortinget og regjeringa for å sikre gode samband i bygd og by, enten det er med rassikring, trygge vegar, fly, ferje, hurtigbåt, tog eller breiband, seier Erling Sande i ei pressemelding frå Senterpartiet si stortingsgruppe.
Sande møtte fast på Stortinget for Sogn og Fjordane frå 2005 til 2013, då han var vararepresentant for Liv Signe Navarsete, som var statsråd under heile den raudgrøne regjeringsperioden.
Artikkelen held fram under annonsen.
Han vart valt inn på Stortinget att ved valet i haust, då han var fyrstekandidat for Senterpartiet Sogn og Fjordane, som vart største parti i valkrinsen. Sande leia Energi- og miljøkomiteen på Stortinget frå 2009 til 2013.
− Regjeringsplattforma til Senterpartiet og Arbeidarpartiet er klar på at vi skal utvikle heile landet og knyte det betre saman. Arbeidet i Transport- og kommunikasjonskomiteen blir avgjerande for å lukkast med dette, seier Sande som var konserndirektør for strategi og utvikling i Sogn og Fjordane Energi frå 2013 til 2021.
