– Eit sterkare og meir samla Nordfjord-reiseliv etter covid-19

Over 40 bedrifter i Stryn, Gloppen, Stad og Bremanger har sidan våren 2020 delteke i utviklingsprogrammet SMB Utvikling Nordfjord, sett i gang av Nordfjordrådet i samarbeid med Innovasjon Noreg Vestland.

No i november var det avsluttande samling for på Nordfjordeid, og tilbakemeldingane på programmet var særs gode.

Gode tilbakemeldingar

– Frå Nordfjordrådet si side er vi særs nøgde med å ha fått til eit så godt og slagkraftig samarbeid mellom kommunar og bedrifter i Nordfjord om å kome styrka ut av koronakrisa, seier avtroppande leiar i Nordfjordrådet, Alfred Bjørlo, i ei pressemelding, og held fram:

– Tilbakemeldingane frå bedriftene er eintydig positive: SMB Utvikling Nordfjord har fungert godt som metodikk, bedriftene har fått god hjelp og prosjektet har bidratt til betre samarbeid mellom Nordfjord-kommunane.

Større forståing

– Det er i tillegg svært gledeleg at vi gjennom programmet har fått opp fleire samarbeids- og nettverksprosjekt som vil løfte reiselivet i heile Nordfjord i framtida. Vi har også fått ei større felles forståing av og meir kunnskap om verdien av tettare samarbeid mellom kommunar, destinasjonsselskap og bedrifter om berekraftig besøksforvalting i Nordfjord, seier Bjørlo.

Kring 20 av bedriftene har fått bistand til strategiutvikling og omstilling av eiga bedrift gjennom SMB Utvikling Nordfjord. Mange andre bedrifter har delteke i nettverksprosjekt for å vekse seg sterkare saman. Prosjektet har hatt ei samla økonomisk ramme på 3,2 millionar kroner, der 2,2 millionar er finansiert gjennom Innovasjon Noreg.

Lokalmatsatsing

Dei fleste av dei deltakande bedriftene og nettverksprosjekta er knytte til reiseliv, sidan det er reiselivsnæringa som har vore hardast råkast av covid-19 i Nordfjord. Sluttrapporten for SMB Utvikling skal handsamast på møte i Nordfjordrådet 16. november.

Der vil Nordfjordrådet også ta stilling til fleire av dei tilrådingane om nye felles satsingar for reiselivet i Nordfjord som er komne fram i prosjektarbeidet, mellom anna ei felles satsing på lokal mat og drikke («Nordfjord Smak»), gjennomføring av ei lokal «reiselivsmesse» før sesongstart, og mogleg innføring av besøksbidrag i Nordfjord, slik den nye regjeringa opnar for.

Det blir også arbeidd med ein samla strategi for framtidas nullutsleppstransport i Nordfjord (Grøn Transport Nordfjord) og ei berekraft-sertifisering av Nordfjord som reisemål i regi av destinasjonsselskapet Visit Nordfjord.

Følgjande bedrifter har deltatt i bedriftsutviklingsprosjektet:

· Bremanger: Norway Adventures, Knutholmen, Vingen Visningssenter og Hjortegarden (Bremanger har i tillegg hatt seks andre bedrifter med i prosjektet, finansiert lokalt)

· Stad: Sagastad, Bergart, Nordfjord Hotell, Feel Free Production og Norsk Fjordhestsenter

· Gloppen: Sølvane Gard, Repix og Norsk Fjordhestgard

· Stryn: Sandeåsen Feriehytter, Jostedalsbreen Nasjonalparksenter, Kjenndalsstova AS, Sande Camping, Asbjørn Fure, Briksdalsbre Fjellstove og Stryn Aktivitetslodge