– Eg er lite imponert

Fredag la staten fram sitt tilbod i jordbruksoppgjeret. – Avstanden er stor, seier leiar i Vestland Bondelag, Gry Ingvild Agjeld.

Jordbruket sitt krav er på 6,9 mrd.kr. og staten sitt tilbod er på 3,341 mrd.kr.

– Eg er veldig skuffa, og hadde håpa på eit betre tilbod, seier Agjeld i ei pressemelding.

– Må langt meir til

Kravet frå Norges Bondelag prioriterte tetting av inntektsgap mot andre grupper med 120.000 kroner per årsverk. Staten sitt tilbod legg opp til å redusere inntektsgapet med 40.000 kroner.

– Tilbodet syner ei form for vilje til å redusere avstanden, men det er ikkje godt nok. Det må langt meir til for å sikre norsk landbruk i framtida.

Avgjerande med større inntektsløft

– I kravet til bondelaget vart det lagt stor vekt på kva type landbruk vi skal ha i framtida. Vi la vekt på mellom anna satsing på mjølk, betre velferdsordningar og eit meir berekraftig landbruk, seier Gry Ingvild Agjeld.

Ho fortel at skal folk vere i næringa, eller ynskje å gå inn i næringa må inntekta opp.

– Skaper ikkje framtidstru

– Skal tvilen til bøndene forsvinne, må lønsemda i landbruket betrast betydeleg. Det er uheldig at staten baserer seg på stadig å etterbetale bonden i form av kostnadskompensasjon framfor å auke inntektsmoglegheitene. Dette gir ein vanskeleg økonomisk situasjon for mange og det skaper ikkje framtidstru.

Leiaren i Vestland Bondelag hadde håpa på eit langt betre tilbod, og er særskild skuffa over at dei små og mellomstore bruka i distrikta ikkje er prioriterte.

– Eit dårleg svar

– Dette tilbodet er eit dårleg svar på målsetjinga om eit berekraftig landbruk i heile landet, og ein matberedskap som sikrar norske menn, kvinner og barn trygg, sunn mat produsert på norske ressursar.

No skal Norges Bondelag lese tilbodet nøye, og vurdere grundig korleis det slår ut for bøndene og norsk matproduksjon framover. På bakgrunn av gjennomgangen vil Norges Bondelag avgjere om det er grunnlag for å gå i forhandlingar med staten eller ikkje.