E39 i Våtedalen er opna att
E39 gjennom Våtedalen opna att for fri ferdsle kl. 16:20 måndag etter at det i ein periode hadde vore trafikkdirigering som følgje av brann i ein semitrailer.
– Det var branntilløp i motorrommet til semitraileren, men føraren hadde sløkt mykje sjølv før brannmannskap som sløkte resten kom på plass, opplyser vakthavande brannbefal i Gloppen brann og redning, Arne Mykland.
Han fortel at det aldri var snakk om ein stor brann, men at det kom opne flammar frå motorrommet.
Artikkelen held fram under annonsen.
– Truleg er det ei teknisk årsak til at det tok fyr, seier han og legg til at det var kalk, og dermed ikkje noko farleg gods, i hengaren.
Traileren er trygt plassert i ein busslomme og dermed ikkje til hinder for trafikkavviklinga.
Det blir truleg ny dirigering av trafikken når trekkvogna skal hentast av bilbergar seinare i kveld. Kalkvogna kjem til å bli ståande att.