– Det mest sentrale kontoret i fylket er føreslege nedlagt
Jølster er mellom lensmannskontora i Sunnfjord som er føreslegne nedlagde av arbeidsgruppa som har kome med tilråding i saka.
I framlegget går det fram at Jølster, Askvoll, Hyllestad og Gaular kan bli utan lensmannskontor. Også kontora i Selje, Bremanger, Balestrand, Luster, Aurland, Årdal eller Lærdal, Gulen og Solund bli lagde ned, om forslaga som no er leverte til politimeisteren i Vest politidistrikt blir vedtekne.
– Mister litt av kjennskapen
Det vil bli att tre lensmannskontor i Sunnfjord: Florø, Dale og Førde. I Nordfjord blir det kontor både i Gloppen, Stryn, Eid og Vågsøy.
Det har lenge vore klart at regionlensmannen i Sunnfjord tilrår å leggje ned kontoret i Jølster. Fleire politikarar uttrykte uro over forslaget då saka var oppe som referatsak i kommunestyret sist veke.
– Dei som arbeider ved lensmannskonoret bur her og er i nærområdet også utanom arbeidstida. Dei blir kjende med tilhøva. Det blir litt annleis når dei buset seg i Førde, dei mister litt av kjennskapen til lokalsamfunnet, sa Pål Befring (Ap).
– Eg ser det er ei veldig uheldig utvikling at lensmannen kjem sist på plass ved ulukker, konstaterte Einar Gautefall (SV), medan ordførar Oddmund Klakegg (Sp) ikkje la noko mellom:
– Det er den eine reforma etter den andre. Mykje av det går på å demontere lokalsamfunna i trivselsfylket Sogn og Fjordane. Det mest sentrale lensmannskonoret i fylket er føreslege nedlagt.
Les meir i papirutgåva onsdag.