Dei fleste får førstevalet sitt
Førsteinntaket til vidaregåande skule 2021/2022 i Vestland er klart. Tal frå fylkeskommunen viser at dei fleste elevane får førstevalet sitt. Torsdag fekk 22 .273 skuleelevar i fylket svar på søknaden sin om skuleplass til hausten.
19 824 søkjarar med ungdomsrett (ungdom mellom 15-24 år) er no tatt inn til vidaregåande opplæring i Vestland fylke. Av desse får 16.737 tilbod om skuleplass etter førsteønsket sitt for både programområde og skule. Dette inneber at majoriteten av dei unge, også i år, får det opplæringstilbodet dei ønskjer seg allereie ved førsteinntaket, opplyser Vestland fylkeskommune i ei pressemelding.
Auke i tal søkjarar til yrkesfag
For eitt år sidan hadde Vestland fylkeskommune totalt 9.044 søkjarar med ungdomsrett til yrkesfag. I år er det totalt 9.253 søkjarar, altså ein auke. 8.744 med ungdomsrett som har søkt yrkesfag har no fått plass ved førsteinntaket.
Artikkelen held fram under annonsen.
Tilsvarande var det i fjor 11.726 med ungdomsrett som søkte studieførebuande. I år er dette talet 11.546, altså ein liten nedgang for studieførebuande utdanningsprogram. 11.080 av søkjarane til studieførebuande har fått plass ved førsteinntaket.
Til saman 22.273 har søkt om skuleplass i Vestland til dette skuleåret. 20.799 av søkjarane desse søkjarane har ungdomsrett.
1.253 ledige skuleplassar
Etter førsteinntaket er det 975 søkjarar med ungdomsrett som ikkje har fått tilbod om skuleplass. Årsaka til dette er at søkjarane ikkje har søkt på tilboda som er ledige.
Det er i dag 1.253 ledige skuleplassar i fylket. Søkjarar som har ungdomsrett og som ikkje har fått tilbod om skuleplass, vil få tilbod i dei seinare inntaka, eller etter at skulane tek over inntaket. Søkjarar som ikkje har ungdomsrett står på venteliste og kan bli tekne inn til ledige plassar etter at skulane har teke over inntaket i august.
Sjekk og svar på vigo.no
Frå 8. juli kan elevane gå på nettsida vigo.no og sjå om dei har fått skuleplass. Dei må no svare på om dei tek imot plassen innan svarfristen fredag 16. juli. Det er viktig å svare på vigo.no innan fristen, ettersom manglande svar fører til at eleven mister plassen sin, og risikerer å bli tatt ut frå ventelista.
Tidsplan for inntaket til vidaregåande skule i Vestland:
8. juli: tilbod blir gitt på vigo.no om første inntak
16. juli: svarfrist for første inntak
Artikkelen held fram under annonsen.
22. juli: melding om andre inntak
30. juli: svarfrist for andre inntak
5. august: tredje inntak. Du svarar ja til tilbodet ved å møte på skulen første skuledag.
