Bård Kjetil inviterer til vårtreff

Bård Kjetil Aske og Fiskå Mølle lokkar med grillmat, fagleg påfyll og ei triveleg stund på Kattahamrane fredag.

I august i fjor tok Fiskå Mølle i bruk den nye lagerhallen sin på Kattahamrane ved Sandane. Fredag blir det offisiell opning der vararordførar i Gloppen, Per Jarle Myklebust, skal klyppe snora. Det heile blir krydra med aktivitetar som først og fremst er retta mot bøndene i distriktet.

– Vi kallar det vårtreff. Det blir grilling med Nortura, forfriskingar, og Norsk landbruksrådgiving og fleire fagkonsulentar blir til stades, fortel Bård Kjetil Aske og håpar treffet kan vere til inspirasjon for bønder i ei hektisk og på mange måtar krevjande tid.

Fiskå Mølle etablerte lager på Sandane i år 2000, og den daglege leiaren fortel om stabile leveransar av driftsmidlar til landbruket.

– Vi er avhengige av å ha litt volum, og det har vi, seier han og opplyser at kundemassen strekkjer seg frå Vik i Sogn i sør til Standal på Sunnmøre i nord.

– Marknadsdelen vår varierer frå bygd til bygd, han er ganske bra her i Gloppen, held han fram og håpar på godt oppmøte på vårtreffet:

– Alle er hjarteleg velkomne, dette blir ein fin dag både fagleg og sosialt.