3,4 milliardar til Stad Skipstunnel

Stad Skipstunnel blir fullfinansiert og klargjort til opning i 2025 i Regjeringa sitt framlegg til ny Nasjonal Transportplan.

Fredag legg Regjeringa fram ei eiga sak til Stortinget om å byggje Stad Skipstunnel. Stad Skipstunnel blir det største investeringsprosjektet for sjøtransport i Noreg nokonsinne, og eit unikt prosjekt også i verdssamanheng.

– Stad Skipstunnel vil opne opp Vestlandet sjøvegen, og ha større ringverknader for utviklinga av kysten i framtida enn dei fleste kan sjå for seg i dag. Eg er svært nøgd med at Regjeringa no gjev «full gass» og fjernar all tvil om vidare framdrift for Stad Skipstunnel, seier ordførar i Stad og 1. kandidat for Venstre i Sogn og Fjordane, Alfred Bjørlo, i ei pressemelding.

– Stad Skipstunnel har vore ei særs viktig sak for KrF over lang tid, og er like viktig for trygg transport på sjøen som satsing på rassikring og trygge vegar er på landjorda. Eg vil rose samferdsleminister Knut Arild Hareide for tempoet i å få på plass nødvendige vedtak om byggjestart for Stad Skipstunnel etter budsjettvedtaket i Stortinget i desember, seier 1. kandidat for KrF i Sogn og Fjordane, Tore Storhaug.

Dei to får følgje av 1. kandidat for Høgre i Sogn og Fjordane, Olve Grotle:

– Det er enorme moglegheiter for vekst og verdiskaping i maritime næringar, havbruk og andre kystnæringar på Vestlandet i åra framover. Stad Skipstunnel fjerner den barrieren Stadhavet er i dag for å utvikle desse næringane, og gjer det mogleg med samanhengande, trygge ruter for gods og passasjerar på kysten av Vestlandet

Stad skipstunnel vil bli 1,7 kilometer lang og vere dimensjonert for skip på storleik med hurtigruteskipa og store ringnottrålarar. Det vil seie seglingsbreidde på 21,5 meter, seglingshøgde på 33 meter og seglingsdjup på 8 meter.