241 kunstnarar vil utsmykke fylkeshuset i Vestland

241 kunstnarar har meldt si interesse for å bidra med kunst til det nye fylkeshuset i Bergen. 66 av dei held til i Vestland.

Det skriv fylkeskommunen i ei pressemelding.

– Dette er skikkeleg stas. Det er eit tydeleg signal om at det nye fylkeshuset blir sett på som ein attraktiv plass å få plassert kunsten sin. Vi set stor pris på at så mange kunstnarar ønskjer å bidra med kunst til Vestland fylkeskommune, seier Ronny Skaar, seksjonssjef for kunst- og kulturutvikling i Vestland og medlem i kunstutvalet for bygget i pressemeldinga.

Den samla budsjettramma for kunstprosjekta er 6,5 millionar kroner. Etter kvart vil det bli lyst ut konkurransar, og kunstutvalet vil også gi direkte oppdrag til kunstnarar.

– Fylkeshuset i seg sjølv blir eit signalbygg i bybildet, og prosessen med plassering av kunst både inne og ute blir spennande å følgje vidare, seier Skaar.

Det nye fylkeshuset skal stå ferdig midt i Bergen sentrum til årsskiftet 2022–2023.

(©NPK)