– Eit breitt tilbod på Firda vgs gjeld meir enn skule

Firda vgs seier om seg sjølv: «Meir enn ein skule!». Det har ein gjennom over hundre år vist i praksis ved grundig fagleg arbeid, investering i bygg og ikkje minst bygging av unge menneske i formande år. Det er ein innsats det står stor respekt av.

Å ha eit breitt tilbod på Firda vgs, som også inkluderer studiespesialisering, gjeld imidlertid også noko langt meir enn nettopp skule. Det er slikt som aukar bulyst for både heimatt-flyttarar og nytilflyttarar, og som gjev trua på at distrikta kan skape attraktive faglege miljø både å lære og arbeide i.

På Nordfjord folkehøgskule har vi kvart år fulle hus av ungdomar frå heile landet. Mange av desse får eit første møte med distrikts-Norge, og vi veit at opplevinga av eit bygdesamfunn med varierte moglegheiter kan få desse til å etablere seg på sikt. Dette har allereie skjedd gjennom fleire tiår.

For dei familiane som står på vippen til å skulle reise eller bli, kan nettopp slike faktorar som fagtilbod verte tunga på vektskåla i den store rekneskapen. Synergiane ved å ha eit sterkt fagmiljø på så mange felt som mogleg på Firda er viktig for oss som skule, og ikkje minst som arbeidsplass.

Det å kutte i tilbodet truar difor fleire element i vårt lokalmiljø enn berre ein skule.

Urimelegheita i at Firda vgs igjen skal få eit stort kutt, som ved førre skulebruksplan, gjer at høyringsmoglegheita må brukast godt av alle som får høve til å uttale seg. Og det openberre målet må vere å behalde så mykje breidde som mogleg på ein svært god skule.

Hildegunn Gj. Tennebø,

rektor Nordfjord folkehøgskule