Kvartetten er klar for nye julekonsertar
Etter koronapause er gruppa Tre kvinner og ein mann endeleg klare for nye julekonsertar.
I helga 9.-11. desember er det Olden, Utvik og Hyen kyrkje som får besøk. Gruppa startar i Olden fredag, er i Utvik laurdag og i Hyen søndag.
Denne julekonserten er ein konsert både å sjå fram til, og å glede seg til. Songarar og musikarar lovar å by på fredfull julestemning gjennom ord og tonar, men alle som har høyrt gruppa veit at medlemene lett lager god stemning også mellom songane.
Artikkelen held fram under annonsen.
Gruppa, med Randi Skaaden Felde, Britt Glomnes Willumsen, Hege Alme og Sjur Atle Austrheim, er kjende for å by på eit rikt og variert julerepertoar. Dei framfører julesongar ikledd vakre arrangement. Det vert eit par nye songar, og det vert gjenhøyr med julesongar ein trudde var gløymde.
Med seg har dei dyktige og røynde musikarar i Camilla Hole, Bjørn Breilid, Jakob Leiv Kroken, Henrik Silfverhielm og orkesterleiar Arne Søholt.
Ønskjer du å kjenne roa senke seg og la julestemninga sige inn? Det blir mykje å glede seg over og mykje å nyte i Olden, Utvik og Hyen kyrkje denne helga.
Kanskje det er i år julegåva bør gjevast på forskot, i form av ein julekonsert?
