Flott familiedag ved Pederhuset
Sigrid Moldestad & Regndråpeorkesteret inviterte laurdag til familiekonsert og dans ved Pederhuset i Breim. – Dette er første gong vi har laga ein familiedag på denne måten, og det var veldig kjekt at så mange kom, smiler artisten.
Konserten var ein del av programmet i Pederhusveka, som er arrangert av Pederhusets vener. Musikken var henta frå plata «Regndråpeborna», som Moldestad gav ut i vinter.
– Leikne tekstar
– Songtekstane er dikt skrivne av Jan-Magnus Bruheim. Han skreiv veldig leikne tekstar. Han hadde gode observasjonar, heilt ned på eit mikronivå, fortel ho.
Artikkelen held fram under annonsen.
Moldestad legg til at musikken er laga for å stemme overeins med dei inntrykka som dikta gjev.
– Arbeidet med «Regndråpeborna» har vore veldig kjekt, både i studio og på konsertar, seier artisten frå Breim.
Fekk vere med Sigrid
På scena hadde Sigrid med seg tre profesjonelle musikarar, og laurdag fekk dei også støtte av fleire jenter frå området. Tre av dei heiter Ada Gloppestad Hjelle (5), Jenny Gloppestad Hjelle (8) og Eirin Paulen (9).
– Det var veldig kjekt og lærerikt å få vere med å synge, seier dei.
Jentene var med å synge «Snigla som sykla», «Regndråpeborna», «Sutrelid» og «Liten gut fortel». Dette er fire av låtane på plata «Regndråpeborna».
Dansa gamaldans
– Vi var også med på å danse, og det likte vi veldig godt, smiler dei tre jentene.
Det var Mari Andrea Næss og Elin Grytting som arrangerte sjølve dansen.
– Dei to er flinke til å få med seg dei unge, poengterer Sigrid Moldestad.
Artikkelen held fram under annonsen.
Historisk tilknyting
Familiekonserten vart skipa til i hagen til Pederhuset i Breim.
– Dette huset høyrde til spelemannen Peder Råd. Breim er ein stad der det historisk har vore mykje musikk og speling, forklarer ho.
I 2016 tok artisten initiativ til å berge bustaden frå å forfalle.
– Vi var ein gjeng som starta arbeidet med å pusse det opp. Så blei vi etterkvart ei venneforeining, Pederhusets vener.
Første familiedagen
Ho synest det er kjekt å kunne bruke huset slik det vert brukt no – som ei ramme for kulturelle opplevingar.
– Dette er første gong vi har laga ein familiedag på denne måten, og det var veldig kjekt at så mange kom. Særleg stas er det å få med seg borna, slik at dei kan få oppleve dans, song og felespel.