Fleire startar medieabonnement i samband med koronakrisa

Fleire personar har starta å abonnere på ei avis, TV-kanal eller strøymeteneste under koronakrisa enn delen som har sagt opp, viser ei ny undersøking.

13 prosent har starta, eller vurderer å starte, minst eitt medieabonnement i samband med koronautbrotet, viser undersøkinga frå Medietilsynet.

8 prosent har starta eit nytt abonnement på avis, TV eller strøymetenester, medan sju prosent vurderer eit nytt abonnement.

– I ein krisesituasjon har media ei svært viktig rolle, både når det gjeld å formidle viktig informasjon, få fram ulike syn og stille kritiske spørsmål. Når undersøkinga vår viser at fleire har starta enn sagt opp eit medieabonnement i samband med koronakrisa, underbyggjer det kva media har å seie i ein slik situasjon, seier direktør Mari Velsand i Medietilsynet.

Ifølgje undersøkinga har 10 prosent sagt opp, eller vurderer å seie opp, minst eitt medieabonnement i samband med koronautbrotet. 5 prosent har sagt opp minst eit abonnement, medan 6 prosent vurderer oppseiing.

Undersøkinga vart gjennomført den første veka i april.

(©NPK)