Her vil vegvesenet byggje forbikøyringsfelt og kjettingplassar
Statens vegvesen legg i dag ut framlegg til reguleringsplan for riksveg 5 Lunde - Lundebotn på offentleg høyring.
Målet med planen er å regulere areal for å byggje forbikøyringsfelt og kjettingplassar langs rv. 5 mellom Kjøsnestunnelen og Fjærlandstunnelen.
Dette er området
Strekninga har ei lengd på om lag to kilometer og stigning på opp mot åtte prosent. Den bratte stigninga fører til at spesielt tyngre køyretøy mister fart og det oppstår trafikale problem, spesielt vinterstid.
Artikkelen held fram under annonsen.
– Statens vegvesen vurderer at våre planlagde utbetringar gir betre trafikktryggleik og vesentleg betre framkomst på strekninga, skeiv vegvesenet i ei pressemelding.
Ikkje til hinder for planlagt gondolprosjekt
Parallelt med dette blir det jobba med planar for å realisere Jostedalsbreen Glacier Gondol.
– Statens vegvesen og Jostedalsbreen AS har hatt godt samarbeid for å prøve å samordne planane. Gjennom dette arbeidet viste det seg mest hensiktsmessig for begge partar å jobbe med planane kvar for seg, heiter det i pressemeldinga.
Statens vegvesen sine planar for rv.5 Lunde - Lundebotn er mogleg å kombinere med bygging av gondolprosjektet.
– Vår plan legg opp til at rasvoll på nordsida av rv.5 må forlengast. Truleg må denne flyttast og/eller forlengast endå meir ved ei framtidig bygging av botnstasjon for gondolanlegg. Dette er løysbart, og våre planar vil ikkje vere til hinder for bygging av gondol, seier seksjonssjef Tone Anette Espe i Statens vegvesen.
– Eit godt prosjekt på fleire område
– Dette er eit godt prosjekt som Statens vegvesen prioriterer i gjennomføringsplanen til NTP (Nasjonal transportplan). For å kome i posisjon for tildeling av midlar, er gryteklare planar heilt vesentleg, understrekar Espe og held fram:
– Prosjektet treffer godt med omsyn til fleire av Statens vegvesen sine toppmål: Det gjev betre og meir føreseieleg framkomst og betre trafikktryggleik, det aukar konkurranseevna for næringslivet, det gjev meir for pengane, og ikkje minst tar vi vare på og utviklar det vi har, avsluttar Tone Anette Espe.
