500.000 har enno ikkje opna skattemeldinga

Har du ikkje sjekka skattemeldinga, bør du gjere det før fristen går ut laurdag. – Det kan vere at du kan ha meir pengar til gode, forklarer skattedirektøren.

To dagar før innleveringsfristen har ni av ti nordmenn opna skattemeldinga, og over 2,3 millionar har levert ho. Samtidig er det 500.000 nordmenn som ikkje eingong har opna skattemeldinga. Dei får no ein peikefinger frå skattedirektør Nina Schanke Funnemark.

– Eg oppmodar alle som ikkje har opna og sjekka skattemeldinga om å gjere dette innan leveringsfristen. Det er ditt ansvar å sjekke at opplysningane er rette, seier ho.

Når du opnar skattemeldinga, er det viktig at du ikkje berre sjekkar om du ligg an til å måtte betale restskatt eller har skattepengar til gode.

Kan gå glipp av pengar

Schanke Funnemark påpeikar at skattemeldinga berre nesten er ferdig, og at du sjølv må gjere den ferdig.

– For fleire vil det vere informasjon du sjølv må fylle inn, til dømes frådrag, opplysningar om eigedom, sal av bustad, eller verdiar i andre land. Det kan nemleg vere at du skal ha meir pengar til gode enn det den nesten ferdige skattemeldinga viser, forklarer skattedirektøren.

Blir skattemeldinga levert innan fristen 30. april, får du utbetalt skatt du eventuelt har til gode når Skatteetaten har behandla skattemeldinga di.

– Nokon må smørje seg med tolmod

– Du kan la vere å sende inn skattemeldinga, men berre dersom alle opplysningane i skattemeldinga stemmer. Då må du vere klar over at du tidlegast kan få skatteoppgjeret og eventuelle pengar til gode utbetalt i slutten av juni, seier Schanke Funnemark.

Sjølv om dei fleste vil ha fått skatteoppgjeret i juni, vil nokon måtte smørje seg med tolmod og vente til hausten, opplyser Skatteetaten.

– I juni vil omtrent ni av ti ha fått skatteoppgjeret og eventuell skatt til gode utbetalt. Får du restskatt, vil du få ein faktura med første betalingsfrist i august, seier skattedirektøren.

(©NPK)