– Nordfjord syner veg for Vestland

- Det er utruleg gledeleg at Hovudutval Opplæring i Vestland i dag har gjeve grønt lys for å lyse ut vaksenopplæringsklasser tilpassa lokalt næringsliv ved alle dei fire vidaregåande skulane i Nordfjord, slik eit samla Nordfjord har gått saman om å få på plass.

Det seier leiar i Nordfjordrådet, Alfred Bjørlo. Dei fire vaksenopplæringstilboda som no er mest aktuelle for utlysing i Nordfjord neste skuleår er Byggfag ved Stryn vgs, Industriteknologi på Eid vgs, Akvakultur ved Måløy vgs og Helsefagarbeidar på Firda vgs.

Gloppen-modellen

- Kommunane i Nordfjord (inkludert Bremanger), næringslivet (alle næringsorganisasjonane i Nordfjord unnateke Måløy Vekst), NAV og dei fire vidaregåande skulane har arbeidd intensivt det siste halvåret for å byggje ut den såkalla «Gloppen-modellen» for yrkesretta utdanning til vaksne til å omfatte yrkesretta opplæringstilbod på alle dei fire skulane i Nordfjord. NAV har delteke aktivt i prosjektet, og det er gjort avtaler som sikrar at det blir kostnadsfordeling mellom NAV og fylket for å få dei nye opplæringstilboda opp å gå.

Nyskapande

- Dette blir ein nyskapande modell som gjer at vi stat, fylke og kommunar no «matchar» ønskjet om å få flyktningar og andre vaksne som står utanfor arbeidslivet raskt ut i arbeid med lokalt næringsliv i Nordfjord si trong for fleire fagarbeidarar, seier Alfred Bjørlo. – Den utvida «Gloppen-modellen» som vi no har utvikla i Nordfjord, og fått NAV med på i eit strukturert samarbeid, bør vere til inspirasjon både i resten av Vestland og nasjonalt. Det er også eit særs godt døme på kor viktig samarbeid i Nordfjord er, og kva vi kan få til når vi står saman, seier Nordfjordråds-leiar Alfred Bjørlo.