Usemje om ansvar

Usemja mellom Jølstra Kraft AS og Jølster kommune, om kven som har ansvaret for å tilrettelegge tippområdet i Sunnfjord Næringspark, held fram.

Det har sidan i haust vore forhandla og
vore kontakt mellom partane om korleis utbyggingsavtalen skal tolkast. Det
handlar om kven som skal ta kostnaden med å tilrettelegge for plassering av
tunnelmassane som kraftverket skal levere og planere ut vederlagsfritt.

Kan hamne i retten

Det har sidan nyttår vore både møte og
omfattande e-postutveksling mellom partane. Av det vi kan lese av
korrespondansen, ser situasjonen rimeleg fastlåst ut.

 
Saka var oppe på formannskapsmøtet sist torsdag, som referatsak, men då
vart møtet lukka. Same dag sende kommunen brev til Jølstra Kraft der det blir
synt til formannskapsmøtet der det vart bestemt å få gjort ei juridisk
vurdering av heile sakskomplekset.

 
Kommunen har tidlegare avvist alle krav frå Jølstra Kraft AS om å dekke
kostnadane for fjerning av skog og lausmassar, ein kostnad som frå
kraftselskapet si side er kalkulert til 27 millionar kroner, der Jølstra kraft
har sagt at dei skal ta to millionar. Kommunen har gjort det klart at saka blir
sendt til tingretten om det ikkje blir snarleg semje.

Korte fristar

Den 11. februar fekk kommunen tilsendt eit
utkast til det som vart kalla «avklaringsavtale» I den vart det gjort forsøk på
å få kommunen med på at utbyggaren skal plassere massane på tilvist plass og
forskotere kostnadane med tilrettelegging av tippområdet inntil avklaring om
tvisten. Det står også i avtaleutkastet at partane skal halde fram dialogen med
sikte på å sleppe det varsla søksmålet. Er det ikkje semje innan 01.10.19, skal
kommunen ta ut søksmål for å få ei rettsleg avgjerd i saka. Om utbyggjaren vinn
fram med sitt syn på kven som skal ta kostnadane med tilrettelegging, blir det
å fakturere kostnadane til Jølstra Kraft AS, med tillegg av forsinkingsrenter
inntil kommunen betaler, heitte det i avtaleutkastet som hadde eitt døgns frist
for aksept, men som vart blankt avvist av kommunen same dag.

Overraska utbyggjar

Same dag, altså 11. februar kjem det svar
frå Jølstra Kraft AS der det blir uttrykt overrasking over at kommunen ikkje
vil gå med på avtaleutkastet.

   –
Vi  er sjølvsagt innforstått med at
Jølster kommune ".. ikkje har akseptert å ta kostnadane med forarbeidet."
Heile poenget med vårt framlegg til avtale er jo at denne usemja ikkje skal få
forseinka og/eller fordyra anleggsarbeida. Framlegget til avtale inneber at det
er domstolane som skal ta standpunkt til kven som skal bera dei endelege
kostnadene med forarbeidet, viss ikkje partane seinare vert samde.

  Vi
kan ikkje sjå at Jølster kommune har ein sakleg grunn til å motsetja seg ei
slik løysing med fastsetjing av kostnadsansvaret i ettertid, jfr. dykkar brev
frå 15.01.2019 kor det vart varsla søksmål for Sogn og Fjordane tingrett. Vi
ber om ei nærare grunngjeving for kvifor kommunen ikkje finn å kunne godkjenne
framlegg til avtale innan klokka 12:00 i morgon, heiter det i brevet som er
underteikna prosjektleiar Kjell Johnny Kvamme.

Nytt svar frå kommunen

Sist torsdag, same dag som saka var oppe i formannskapet, for lukka dører, sende kommunen eit nytt brev til Jølstra Kraft AS. Der blir det gjort klart at kommunen vil få utført ei juridisk vurdering, men det blir også stilt nokre spørsmål til Jølstra Kraft, mellom anna til beskjeden kommunen fekk om at om det ikkje blir semje, må utbyggjaren tippe massane i dungar frå denne veka:

• Er dette i samsvar med dei avtalane som er inngått og har Jølster kommune gjeve dykk slikt løyve?

• Er dette i samsvar med den konsesjonen som er gjeve for tiltaket?

• Er dette ei løysing som kan reknast som rasjonell og fornuftig – løysinga vil gje ein auka kostnad

   –
Vi minner om at Jølster kommune har gjeve Jølstra Kraft DA full tilgang til K3
slik at de ikkje blir hindra i dykkar framdrift. Som nemnt over vil vi no få
gjennomført ei juridisk vurdering og vi kjem attende til dykk så snart ei slik
vurdering ligg føre, skriv kommunalsjef Thor Ove Farsund.